Oleh. H Anton Sj - Topos
Dio ade cerito ninik puyang te mena'o pnan terjijai ne neak sadei topos..Lem crito ne o,ade tun idup ne saro..si tingea neak dumai,kemliak ules keadaan idup agok spit,usaho kulo kuang lok brasea..Ite samo-samo namen,amen keadaan peset awei o,areak pasuak o agok kuang lok paok..maklum bae jano de ade ngen si,coa gen ne..cuma ade sekedar ponok ngen kbun titik neak dumai...Tun yo btegen Sugon.
Kiro-kiro skitar malem telau puluak bitang sbanyok,lenget teang...Sugon dong teklep tidua,miko yo mipai..ade tun tuai,kracok ne serbo putiak magea si..tun tuai yo madeak,amen si lok usaho padek nam gacang brasea serto ijai tun kayo...Alau ba mlilia bioa tawen,amen temau gelmem tumuk arus,sudo o igai ade pun buluak kemanyen conong moi bioa..mako nea ba neak di usaho..
Tjagai kunei mipai o sugo yo peker,jano nien ne petunyuk lem mipai o jano sekedar mipai biaso..an miko mnung meker ne. Smudo ne siket crito cnubo ne mlilia bioa tawen,makei eket..An-an temau si gelmem tumuk arus o ano,ade kulo buliak kmanyen cunung moi bioa o...lajau ba si mbiding nea di o...Si kemliak daerah skitar ne,taneak neak di agok datea..cebcea kulo,neker ne amen menea kbun agok coa mukin kareno taneak ne cebceak...Smudo ne si cmubo menea saweak neak di o..si menea saweak alakadar ne. Muloi ba tembas imo o,nbersih ne kute...lajau ba menea pondok,min alat areak koon segalo mecem ne,lajau ba sugo yo menetep neak saweak belau ne o..usaho ne kannyo bi tningea ne..
Saweak bi aper jijai,si muloi mesoa biniak..lok tmanem poi nea saweak ne o...
Ite mok siket ne bae,sudo miko yo batanem...si demnong saweak ne yo,neker ne..ami sesio kerjo ne menea saweak neak pnan o,sbab si kemliak kliling saweak ne o imo kute..neker ne bi paset dau mange saweak ne o,dau ba peker miko yo samo denong...
Bilai bi paok maghrib,ujen me'on kulo wktau o...Si gegutek mtang areak tikea,midup lapu lok istrht...bilai bi kelmen,niuk ne ade saei aneh beak pondok ne..saei kekek ne,tapi lek saei o..Neker ne jano gen ba beak pondok ne o...si gegutek midup obor lok smulau saei beak pondok ne o..Si tuun kunei pondok kemliiak ade bnatang,awei olok ne,tapi lai sktr klai pun peing,awok ne bsinea teang...goyo saben sugon yo kemliak ne..neker ne jano gen bnatang yo...
Smudo ne lem keadan panik awei o,si cmubo mok kain ne,si meker ami dio ba tai mipai ne wktau o..Lajau ba si maok bnatang o,samo mbaco pateak-pateak didik..nlatok ne mukus bnatang o,sudo si mukus..nyep bnatang bsinea yo ano,si kemliak lem kain utuk mukus yo ano ade cicin,muloi si heran...an si kemliak cicin o,lok si makei agok ragau asai ne..Si belek mdasei igai,smamung istrht ne..cicin o npek ne iding awok..Coa an si tidua mipai igai si tun tuai makei bajau putiak awei neak mipai ne pertamo o,tun tuai o madeak cicin o naik bebaik,amen bi menea umeak npek das bubung,syarat ne igai..amen bi jayo jibeak nien omong....
Semjak o usaho sugon yo brasea trus,amen mngetem asea ne dau nien..Lajau nam jemuoa belas,tmukua areak ternok,tmukua taneak sgalo mecem ne..siket crito lem wktau siket sugon yo ijai tun paling kayo baik neak topos awei o kulo neak lebong...Mas ne dau,taneak,saweak serto tuoa poi dau kulo...pokok ne idup sugon yo ijai tun paling jayo...
Idup sugon bubeak nien,dau hok idup senang..si kulo bi ade ngenyan,bi ade anok kulo...An-an anok2 ne bi lai,lok moi pnek,lok btunok...Bi ade kulo stamang sugon,coa traso si bi muloi tuai...Areak saweak,kbun snayo ne anok-anok ne mliaro,si lok idup tenang maso tuai..
Pado suatu bilai,sugon yo lok majok pihak bisan ne bdu'o neak umeak ne..dau ba tamu-tamu kunei daerah luyen nundang sugon utuk moi acara nea ne o...Dau ba areak kbeu nunuak untuk semiap hidangan tamu-tamu kunei daerah uak...
Pado bilai acara o terjijai ba peristiwa paling sugon coa kemlok slamo idup ne,jibeak nien kecek omong...Waktau midang tamu mukmei,kecek stamang sugon agok mnyingung didik...Stamang ne madeak ngen tamu-tamu hadir o
" Maro ba ite mukmei sanok spasuak kute ne,coa de gen lapen te die..cuma ade daging kebeu nunuak neak gaang ano.." doo nadeak stamang ne, tamu-tamu yo tun pemuko sukau taneak jang kute..lajau ba tamu yo jmawab " Maaf bae sanok,iso keme coa lok mukmei,tapi gelang emas anok-anok slawei keme sapei skoa,coa nam akuak mnyuep,coa si baik asai ne keme bae mukmei..terimokasiak sudo munuak kbeu neak gaang utuk keme,keme coa an igai mukin lok pamit belek "
Waktau miuk kecek o sugon cigai nam madeak jano-jano igai,kembiak mengiak ne si ngen stamang ne o..lok si munuak asai ne..si bi an madeak kannyo ngen klrgo ne,jibeak omong..bilai o sedih,selek,bcapua kute prasaan sugon..
Kelmen be ne,samo guling-guling nak umeak ne,kenliak sugon kunei palai umeak ne ade bioa tettik...si kemliak moi palai,rupo ne cicin naik ne mena'o bi ijai bioa...Namen sugon langsung bahwa si yo bakea idup peset igai...kareno keluargo ne ade kemluea kecek omong.
Muloi wktau o,areak hok sugon muloi bkuang,asea panen saweak ne cigai dau igai..awei o kulo areak ternok,dau matei..An-an tekbeak sugon,kareno kecek omong stamang ne yo ano...
Lem crito ne,sugon mningea..hok ne muloi abis kute,areak saweak tejuoa..mako berakhir jayo sugon.
Uyo kubua sugon yo gi ade neak topos,kubua paling lai suang..pningea saweak ne gi ade,saweak neak sadei tlang belau mnurut crito ne sugon kute temuan...
Dio ba crito sugon,crito tun kayo sadei topos..Sugon min sipet dermawan,coa omong,ramah tamah ngen tun..sugon coa min sipet tmangen,coa maik sipet lekat atei,si kulo perneak mding idup saro ayok si ijai jayo.. Tapi sayang,kareno kecek stamang ne omong,hok sugon awei dawen nmuk olok ne..abis kute lem wktau siket.
Plajaran magea ite hok ade ba pinyem magea ite,amen jayo jibeak nien min sipet omong,jibeak min sipet kisit..Ramah tamah,dermawan awei sipet muning sugon o perlu ninget amen nasib baik min ite kute ijai tun jayo..
Minoi maaf magea spasuak kute ne keturunan muning sugon neak sadei topos amen ade dalen crito ne agok kuang tepat...Dio sekedar lok minget crito muning te bae...Supayo masiak idup gais keturunan coa nyep,juei coa putus.
Smugo bermanfaat.
0 komentar:
Posting Komentar